منحة Rosa Luxemburg Stiftung

اليوم رح احكي عن #المنحة التانية واللي هي Rosa Luxemburg Stiftung
هاي المنحة بيتم تمويلها من الLinke Partei
وهالحزب من اهم اهدافو هي الديمقراطية والمساواة بالمجتمع بين كل الطبقات.. وهالشي لازم يتحقق حسب وجهة نظرهن عن طريق انو تدفع الطبقات ذوي الدخل المرتفع للطبقات ذوي الدخل المنخفض وهيك بتتحق المساواة.. هاد الشي قلل نسبة الاكاديميين بشكل عام بالحزب.. طبعا بسبب هاد النقص هنن بيرودوا ديما يمولو الطلاب الجامعيين حتى يضلو معهن لبعد التخرج..
اللي بدو يقرأ اكتر عن الحزب اليساري رح يلاقيه ضمن اللينك التالي 👇
منرجع للمنحة.. هي بتفتح حسب مو مكتوب بالاسبوع القادم (KW) وبيتسكر التسجيل ب15.04 للفصل الصيفي وب15.10 للفصل الشتوي
الاوراق المطلوبة للطلاب الاجانب للتقديم لهاي المنحة هنن التالي:
  • Immatrikulationsbescheinigung oder Studienbescheinigung
  • Lebenslauf mit vollständigem Bildungsweg
  • اذا الشخص متطوع او ملتزم بشي حزب او اي منظمة بدهن اثبات عن هاد الشي
  • اعلى شهادة تعليمية موجودة مع الشخص.. اما انغلش او الماني
  • رسائل توصية اذا كان موجود من دكاترة الجامعة.. واكيد اغلبنا ماعندو هيك رسائل لما لنقدم ع اول فصل وهنن بيراعوا هاد الشي
  • شهادة الابيتور وبحال ماكانت المانية او انغلش بدهن النسخة المترجمة المصدقة
  • كشف علامات بحال الشخص دارس شي سابقا او عم يقدم وهو فصل اعلى من الاول
  • نسخة عن الباسبور
  • الاقامة او صورة الفيزا.. مكتوب كالتالي Aufenthaltstitel وهاي بيقصدو فيا الهوية
  • صورة شهادة اللغة عالاقل بمستوى B2...حتى لو الشخص بيدرس فرعو بالانغلش، شهادة اللغة الالمانية مطلوبة
  • واخر الشي Regelstudienzeit
هلأ رح احط اللينكات المهمة للمنحة..
لينك التسجيل من هنا
لينك تأسيس المنحة

مراحل التقديم:
اول الشي المرحلة الاونلاين وبعدا بيبعتو ايميل انو اوك قبلنا طلبك او لا سمح الله رفضنا.. بحال القبول بيبعتو ايميل فيو ايميل دكتور بشي جامعة لتعمل معو موعد ومعك مهلة محددة.. رح تصير مقابلة وحدة طويلة بس ماكتير بيتدخلو بالاختصاص وانما بيهمهن الرأي السياسي سواء هون ب المانيا او بالبلد الام للمتقدم..
وبعدا بينطر فترة شهرين او 3 ليجيه رد انو صار الشخص ضمن المنحة او لا.. بحال القبول رح يتم جمع جميع المقبولين ببرلين (لانو المركز هنيك) ويعملولن الجلسة التعريفية هنيك..
المنحة فيها زمينارات كمان بيقدر الشخص يروح الهن واجتماعات سواء ضمن المقاطعة او براتها..
من هي Rosa Luxemburg:السيدة روزا لوكسمبورغ فكانت ماركسية وحصلت على شهادة دكتوراة وتعرضت للسجن مرات عديدة وكانت ضد الحرب العالمية الأولى ورغم كونها شيوعية انتقدت تصرفات الحكومات الشيوعية واستبداد الحكام للسطلة بالاتحاد السوفياتي مثلاً، بالنهاية تم اغتيالها.
قيمة المنحة للطلاب :649 يورو + 300 يورو شهريا+ نصف التأمين الصحي الحكومي.
بالنسبة للطالب اللاجئ بحالة اخد المنحة بيلتغي البافوغ وبياخد هالمبلغ الشهري، وبحقلك تشتغل إضافة لهالشي بمبلغ لحد 450 يورو ان كان بالجامعة.. بتحصل عالمنحة لمدة ٦ فصول قابلات للتمديد فصلين إضافيات بحالات خاصة، وممكن متابعة الماستر عالمنحة بشرط تسجل خلال ٤ اشهر من التخرج بالماستر.
بالنسبة لطلاب الدكتوراة:قيمة المنحة 1450 يورو شهرياً + نصف التأمين الصحي+ بتدفع المنظمة زيادة عالمنحة مبلغ بحالة بدك تدرس فترة خارج ألماني أو عندك مؤتمر او كورس+ كورسات مكثفة بدولة غير ألمانية لأي لغة عدى الانجليزي لو كان بحثك بيتعلق بدولة مثلاً في طلاب بحثهم بيتعلق بدولة بأمريكا الجنوبية وبيحتاجو لغة بحقلهم عحساب المنحة يسافروا ويعملوا كورس+ مبلغ إضافي لو كان عندك أولاد.
بحقلك لجانب المنحة تعمل عقد عمل مع الجامعة لحد 25 % يعني 700 يورو شهرياً بعد حذف الضرايب، مدة المنحة ٣ سنوات فيك تمددها ل٤ سنوات بحالات استثنائية
حاولت اجمع اكبر قدر ممكن من المعلومات حول المنحة.. اي سؤال انا جاهزة واللي مابعرفو رح قول انو مابعرفو..
وموفقين

إرسال تعليق

يسعدنا مشاركتك معنا

أحدث أقدم

اعلان بداية المقال

اعلان اخر المقال